Madrid, John Paul M.
Colegio de San Juan de Letran – Intramuros
Ang Four Sisters And A Wedding ay handog sa atin ng Star Cinema na isang pang-pamilya o pang-magkakapatid na pelikula. Ito ay tungkol sa Salazar Siblings na muling nagsama-sama makaraan ng ilang taon para sa kasal ng kanilang bunsong kapatid. Hindi lang sila umuwi para masaksihan ito, ngunit para pigilan na rin. Ang pelikula ay hindi lamang nakasentro sa kasal ni CJ, ang bunsong kapatid, ngunit ipinakita rin dito ang mga narating ng magkakapatid. Ang magkakapatid ay sina; Teddie, ang panganay, na OFW sa Spain; Bobbie, naging tagumpay sa kanyang piniling propesyon sa New York; Alex, isang independent Film assistant director; Gabbie, isang guro na nakatira kasama ang kanilang ina; at CJ na kanina’y nabanggit na. Hindi man naging perpekto at masagana ang lahat, pero isa pa rin ang naging dahilan para magkasama-sama at magkasundo sila… ito’y dahil sila ay magkakapatid, sila ay pamilya.
Ang pelikula ay naging matagumpay dahil sa masuring pagpaplano at maayos na organisasyon. Unahin na natin ang casting, hindi maikakailang nakuha nila ang ilan sa mga batikang aktor na nagampanang maayos at nabigyang buhay ang mga pagkatao ng mga karakter. Kasama na rin ang mga make-up artists at stylists na tumulong para lalong mabagay ang mga aktor sa kanilang karakter. Kabilang na rito ang mga maayos at magaling na trabaho ng mga tao sa likod ng pelikula na nag-ayos ng set para mas mabigyang ideya ang manunuod sa kung anong estado ng buhay ang mayroon ang isang karakter, at props para mabigyang ideya ang mga tao sa kung anong posibleng mangyari. Sa mga taong responsable para sa editing na nagbigay ayos sa pagkakasunod-sunod, framing at kung ano-ano pang kailangang i-edit, at sa mga taong responsable sa mga musika o tunog na ginamit sa pelikula para mabigyang kasukdulan ang emosyon sa bawat pangyayari. At lalo na sa mga manunulat na gumamit ng wika na maiintindihan at makakapukaw ng atensyon ng mga manunuod kung saan sila makaka-relate. At hindi rin natin puwedeng makalimutan ang direktor na naging masipag at matalino sa bawat desisyon para sa pelikulang ito. Hindi natin maikakaila ang tagumpay na nakamit ng pelikula dahil sa mga tao sa harap at likod ng camera.
Naging maganda at magaling ang unang handog na pelikula ng Star Cinema para sa kanilang ika-dalawampung anibersaryo. Ito’y napapanahon nga para sa atin upang mas matanggap at mabigyang-pansin natin ang pagmamahal ng pamilya natin. Pero bukod doon, mas matatanggap natin ang sarili natin dahil maaari nating makita ang pagkatao natin sa isa sa mga karakter sa pelikula. At mula doon ay makikita natin na hindi ka man ang pinakamagaling, pinakamabait, pinakamatalino, o pinakamatagumpay, may pamilya ka pa rin na magmamahal sa ‘yo at ang tingin sa iyo’y ikaw ang pinakamagaling/mabait/matalino/matagumpay na taong kilala nila. At ang mas importante nga sa lahat ay ang pagkilala mo sa sarili mo, sa mga kakayahan at kahinaan mo, at pagtanggap dito.
Story of the Boss 